Rugluð!

Allar hafa einhvern tíma lent í því að halda að það sé t.d. miðvikudagur en svo er þriðjudagur. Eða að halda að það sé fimmtudagur en svo er föstudagur.

Ég var að lenda í svolítlu svipuðu. Nema ég var ekki að ruglast á dögum heldur MÁNUÐUM!!! Ég er búin að vera algjörlega sannfærð seinustu eina og hálfa viku að það sé alveg að koma mars. Var meira að segja farin að plana afmælið mitt í mars! Ég skil bara ekki hvernig þetta er hægt. Líka í svona langan tíma... Rúma viku! Ég á að mæta á ráðstefnu í byrjum mars og svo er líka mikið um að vera í kórnum í mars og ég var alveg farin að búa mig undir að mæta á þetta allt saman og farin að skipuleggja tímann. Ég hefði í alvörunni mætt niður í Söngskóla um helgina í æfingabúðir kórsins mín sem eiga að vera í byrjun mars ef ég hefði ekki áttað mig í tíma... Svona er maður vitlaus stundum. :þ

Til hamingju með daginn mamma :)

Hún á afmæli' í dag
hún á afmæli' í daaag
hún á afmæli' hún mammaaaaa
hún á afmæli' í dag!

Hún er kornung í dag
hún er kornung í dag
hún er kornung hún mamma!
hún er koooornúúúúng ííííí daaaaag!

Betra seint en aldrei...

Gleðileg jól!

Og gleðilegt nýtt ár!

Kemur á óvart....

http://www.bb.is/?PageID=26&NewsID=109712

...eða þannig.

Sorglegt

Ég hef svo sem ekki mikið fylgst með umræðunni í þjóðfélaginu upp á síðkastið um feminista en mér finnst samt að hvað það er að vera feministi hafi týnst í umræðunni. Hérna kemur smá skýring:

Feministi er sá sem vill jafnrétti, bæði fyrir konur og karla. Dæmi: Sömu laun fyrir sömu vinnu, fæðingarorlof fyrir bæði kyn o.s.frv.

Og ég held að allir vilji þetta. Þannig að í raun eru allir feministar. Allt annar handleggur eru svo kvenréttindakonur. Þær vilja sérstök kvenréttindi. Enn annar handleggur eru svo karlremburnar sem allir vita hvað er. En feministi er sá sem vill jafnrétti, jafnvægi.

Brasilískt vax

Af hverju hafa stelpur svona mikinn áhuga á því að deila því með mér að þær fari reglulega í brasilískt vax?? Ég hef lent tvisvar í þessu á stuttum tíma. Ég hef afskaplega takmarkaðan áhuga á því að vita hvort þær færi í brasilískt eða ekki. Ekki það að ég sé eitthvað á móti því að fara í bresilískt vax, það er ekki það. Ég skil bara ekki af hverju það kemur mér við hvort manneskjan sem stendur á móti mér sé sköllótt að neðan eða ekki!

Jólasveinagjafapakkalistinn minn :)

Það er komin ósk um að ég setji upp lista fyrir jólin. :) Og hérna kemur hann loksins.

1. Ég er að safna silfri í upphlutinn minn. :) Ég er komin með eina doppu í beltið. Og loksins er ég búin að finna út hvar silfrið fæst, hjá Árna Höskuldssyni gullsmiði, Bergstaðastræti 4.
2. Svo langar mig líka (auðvitað) í seinustu bókina af Harry Potter. Get ekki beeeeðið eftir að fá að klára söguna.
3. Mig hefur líka alltaf langað til að eignast miðju myndina af Lord of the Rings í svona special edition útgáfu, margir diskar saman. Ég á nebbla númer eitt og þrjú en vantar miðjuna.
4. Það sama er upp á teningnum með Harry Potter myndirnar. Ég á fyrstu þrjár myndirnar en vantar næstu tvær.
5. Svo er það Garfield. Ég eeeelska Garfield. Ég á nokkrar bækum með honum en væri sko alveg til í að eiga miiiiklu fleiri! :)
6. Ég væri líka alveg til í að eignast einhver skemmileg spil. T.d. Party og co. eða framhöldin af Catan.
7. Svo er það nýjasta Pirates of the Caribean. Ég á hinar tvær og væri alveg til í að eiga þessa nýjustu líka.
8. Svo eru það sokkamálin... Ég bara get ekki farið í vinnuna án þess að vera í sokkum í stíl við fötin mín. Og núna vantar mig alveg ferlega hlýja sokka sem eru ekki gráir eða hvítir. Nánast allir hlýjir sokkar sem ég á eru gráir eða hvítir en ef ég er t.d. í brúnum bol get ég ekki látið sjá mig í gráum sokkum! Það væri skandall! :þ Þannig að, bleikir ullasokkar væru alveg málið sko. :D
9. Góðar bækur eru líka vel þegnar, enda er ég mikill lestrarhestur. Þá kemur fyrst upp í hugann "Um langan veg. Frásögn herdrengs." Örugglega mögnuð bók.
10. Mig vantar líka í góðan skrifborðsstól. Þessi sem ég sit á núna er orðinn ansi lúinn og er alveg hræðilegur fyrir bakið!
11. Sængurföt eru líka eitthvað sem maður á aldrei nóg af. Og ég eiginlega bara of lítið af! Ég er meira að segja farin að draga fram gömul sængurföt með barbí og ponyhesta myndum til að dekka skortinn... Ekki það að sængurföt með myndum séu slæm. Söngurföt með kisumyndum væru t.d. mjög flott. Eða Garfield-sængurföt! Það væri toppurinn! :)
12. Svo eru það vettlingar. Ég veit ekki hvernig ég fer að þessu en ég bara virðist aldrei eiga nóg af vettlingum. Mér tekst annað hvort að týna þeim eða það kemur gat á þumalinn eða eitthvað svoleiðis.
13. Ullarpeysa er líka eitthvað sem mig vantar sárlega. Fína svarta ullarpeysan sem amma prjónaði handa mér er búin, þ.e.a.s. hún eyddist upp vegna miiiiikillar notkunnar. Og núna er ég búin að hertaka ullarpeysuna hennar mömmu, mömmu til lítillar hrifningar. :þ

Ætli ég láti þetta ekki nægja í bili...? :)

Barmmikil mjóna

Mér tókst í vor að létta mig um örfá kíló. Þau komu að vísu fljótt aftur en hvað um það. Ég man bara eftir því hvað það var pirrandi að finna engan mun á fötunum mínum. Allar buxur voru áfram jafn þröngar og magamálið það sama. Fuss og svei. Eini munurinn sem ég fann var að ég fyllti ekki lengur upp í brjóstarhaldarann minn... Algjörlega típískt! Eini staðurinn sem maður er þokkalega sáttur við að sé breiður, hann þarf endinlega að minnka fyrst!

Núna aftur á móti er þetta allt annað. Ég líka búin að missa örfá kíló síðan ég byrjaði á Herbalife en í þetta skipti fara þau af réttum stöðum. 10 cm bara yfir magann takk fyrir! En bara 1 cm yfir brjóstin. :) Algjörlega fullkomið! Bíðið þið bara, ég verð barmmikil mjóna á tónleikunum mínum í vor! :D

Heilsuskýrla

Og allir líka að fylla út heilsuskýrslu. :D Mjög gaman.

http://www.heilsufrettir.is/siggarosa/healthapplication

Komin á fullt!

Þá er mín bara komin á fullt í Herbalife-viðskiptin! :) Allir að kíkja á nýju heimasíðuna mína! Rosalega flott! :D

http://www.heilsufrettir.is/siggarosa

"Hann er að kíkja á mig..."

Það er eins gott að ég er í megrun! Ég var að sækja litla krúttið hana Evu Katrínu á leikskólann í gær og hún horfði furðulostin á mig.
EVA: "Hvað ertu með í magnum?"
ÉG: "Bara mat."
EVA: "Hann er að kíkja á mig!"
ÉG: "Ha? Er maginn að kíkja á þig?"
EVA: "Já!"
Þetta gengur ekki lengur! Maginn er orðinn svo stór að hann er farinn að hrella börnin í kringum mig! :þ

Óskir...

Eins gott að passa sig á því hvað maður óskar sér... Í dag lenti ég í því að rúðupissið á bílnum mínum kláraðist. Og rúðurnar voru orðnar frekar kámugar. Þannig að ég hugsaði: "Ég vildi óska að það kæmi almennileg demba sem myndi hreinsa rúðurnar." Og mér varð sko sannarlega að ósk minni! Ég sá ekki út úr augum fyrir vatni...

Sjálfstæður Herbalife dreifingaraðili

Ég er orðin sjálfstæður Herbalife dreifingaraðili. :) Og líst bara alveg ljómandi vel á! Enda var ég á Herbalife ráðstefnu í gær og þar komst ég svo sannarlega að því að Herbalife virkar! Ég hef aldrei á ævinni séð eins mikið af orkumiklu fólki saman komið! Enda fór helmingurinn af ráðstefnunni í að dansa og klappa og skemmta sér. :) Mjög gaman.

En fyrir ykkur sem ekki vitið þá er Herbalife hnitmiðuð næring, jafn að innan sem utan. Innri næringavörurnar eru fyrir þá sem þurfa að léttast, þyngjast, íþróttafólk eða bara fólk sem hefur áhuga á góðri næringu eða að bæta heilsuna. Sem sagt fyrir alla. Og það sama gildir um snyrtivörurnar; þær eru fyrir alla. :)

Allir sem vilja fríar prufur endinlega hafið samband. :) S: 6615838

Herbalife

Þeir sem vilja fríar prufur hafið bara samband. :D

Sími: 6615838

Dagskrá vetrarins

Óperukórinn í Reykjavík

Mozart Requiem
Björgvin Þ Valdimarsson - Heimsfrumflutningur
Beethoven Missa Solemnis með Sinfóníuhljómsveit Íslands og Askenazy
Carmina Burana - Reykjavík
Carmina Burana - Carnegie Hall New York!!! :D
Jón Ásgeirsson - Opera heimsfrumflutningur

Loksins fæ ég að syngja Carmina Burana! Og það í Carnegie Hall í New York! :D

Óperukórinn!

Ég fór í inntökupróf fyrir Óperukórinn á miðvikudaginn. Og ég átti nú svo sem ekki von á því að komast inn í kórinn miðað við hvernig mér gekk. Ég söng eitt lag sem mér tókst ekki alveg að láta hljóma á neðra sviðinu þar sem ég var svo stressuð. Svo tók Garðar mig upp og lét mig syngja nokkrar söngæfingar og mér tókst það svona með herkjum. Svo spilaði hann nokkrar nótur og ég átti að syngja þær en auðvitað tókst það ekki. En mér til mikillar gleði fékk ég símtal seinni partinn í gær þar sem mér að tjáð að ég hefði fengið inngöngu í kórinn! :D Ég skil ekki alveg hvernig ég fer að þessu. Mér tekst alltaf að klúðra öllum prófum en samt næ ég alltaf. Eins og t.d. í tónheyrninni í vorprófinu mínu. Ég hef sjaldan klúðrað einhverju eins illa eins og þá en samt var ég ein af fáum í bekknum sem náði tónheyrninni! Furðulegt.

Ég FÆ frítt í strætó!

Hér með tilkynnist það með stolti að ég FÆ frítt í strætó! :D Ég hefði átt að fárast meira yfir þessu um daginn. En Garðar skólastjóri þurfti víst að hafa mikið fyrir að koma þessu í gegn en það hafðist á endanum. Ekki það að skólastjóri á náttla ekkert að þurfa að standa í svona löguðu, bara af því að fögin í hans skóla eru eitthvað aðeins öðruvísi en í öðrum skólum. En sem sagt, allir á Framhalds- og Háskólastigi fengu strætókort. :) Ég er mjög glöð og ég held að eigi barasta eftir að nýta mér kortið. :)

Ég ER nemi!

Ég hef ótrúlega oft verið spurð hvort að ég ætli ekki að fara að drífa mig í skóla. Fólk virðist ekki skilja að ég ER í skóla, Söngskólanum í Reykjavík. En ég held að skilji af hverju þetta er svona, því fyrst sjálft menntamálaráðuneytið lítur ekki á námið mitt sem "alvöru nám" hvernig get ég þá ætlast til þess að samfélagið sjálft geri það?? Ég las í Fréttablaðinu í morgun að tónlistarnemar fá ekki frítt í strætó eins og aðrir nemar borgarinnar. Og ástæðan er sú að strætó og borgin fara eftir skilgreiningu menntamálaráðuneytisins á því hvað er framhaldsskóli og háskóli. Og Söngskólinn í Reykjavík og aðrir tónlistarskólar flokkast greinilega ekki undir þá skilgreiningu. Samt á þetta að vera nám á bæði framhalds- og háskólastigi og er meira að segja námslánahæft hjá LÍN! Ég spyr, hver er munurinn á t.d. tónlistarnámi og myndlistarnámi? Ég sé hvergi umfjöllun um það að t.d. Listaháskólinn fái ekki frítt í strætó... Ég legg til að Söngskólinn verði skírður Söngháskólinn. Þá er ekki hægt að neita því að hann sé háskóli... :þ

Til hamingju Steini Díva! :)

Tveimur tönnum fátækari...

Ég hef aldrei verið hrædd hjá tannlæknum - alveg þangað til um daginn. Enda hef ég aldrei þurft að láta gera neitt stórt við tennurnar mínar - alveg þangað til um daginn. Ég hef verið, eins og flestir á mínum aldrei, að taka endajaxla undanfarin ár. Og þeir hafa aldrei verið til vandræða - alveg þangað til um daginn. Þá tók einn jaxlinn upp á því að fara að angra mig og ég varð stokkbólgin og rosalega aum. Þannig að ég ákvað nú að láta kíkja á hann. Og ég var varla búin að opna munninn þegar tannlæknirinn sendi mig heim með stóran skammt af sýklalyfjum og sagði mér að ég yrði að koma aftur eftir 10 daga til að láta rífa úr mér tvo endajaxla! Í fyrstu fannst mér það nú svo sem ekkert mál. En þegar það fór að líða að tanntökunni fór stressið að gera vart við sig. En annars varð ég eiginlega ekkert hrædd, ekki fyrr en hann var búinn að deyfa mig. Þá einhvern veginn rann það upp fyrir mér að það var að fara að rífa úr mér tvo jaxla. Þannig að ég skalf og nötraði eins og hrísla og varð lafmóð eins og eftir maraþonhlaup! Ég eiginlega hálf skammaðist mín fyrir þetta en tannlæknar eru sjálfsagt vanir svona. Svo byrjaði hann að rífa. Og bara allt í einu var einn jaxl farinn. Og svo næsti. Og það var bara eiginlega ekekrt stórmál... Það eina sem var ógeðslegt var að heyra brestina sem bergmáluðu í höfðinu á mér... Frekar óhugnalegt...